పవన్‌కళ్యాణ్ కథానాయకుడుగా పూరీ జగన్నాథ్ దర్శకత్వంలో ‘బద్రి’ సినిమా తర్వాత మరో చిత్రం రూపొందుతోంది. ఈ చిత్రానికి దర్శకుడు ‘కెమెరామేన్ గంగతో రాంబాబు’ అన్న టైటిల్‌ను నిర్ణయించి ఇండస్ట్రీలో హాట్ టాపిక్‌గా నిలిచాడు. నేడు చిత్రం షూటింగ్ ప్రారంభం కాగా, అక్టోబర్ 18న ప్రపంచవ్యాప్తంగా చిత్రాన్ని విడుదల చేస్తామని చెప్పడం విశేషం. యూనివర్సల్ మీడియా పతాకంపై డి.వి.వి.దానయ్య ఈ చిత్రాన్ని నిర్మిస్తున్నారు. చిత్రానికి సంబంధించిన ముహూర్తపు సన్నివేశానికి ఎస్.ఎస్.రాజవౌళి క్లాప్ ఇవ్వగా, పవన్‌కళ్యాణ్ కెమెరా స్విచ్ ఆన్ చేశారు. ఈ సందర్భంగా చిత్ర దర్శకుడు పూరీజగన్నాథ్ మాట్లాడుతూ- పవన్ తాను కలిసి చేసిన ‘బద్రి’ తర్వాత మళ్లీ ఓ చిత్రం చేయాలని అనేకసార్లు ప్రయత్నించినా కుదరలేదని, తన 25వ చిత్రంగా మళ్లీ పవన్‌తో చేయడం ఆనందంగా వుందని తెలిపారు. ఓ న్యూస్ రిపోర్టర్ కథ ఇదని, మే రెండవ వారంలో రెగ్యులర్ షూటింగ్ ప్రారంభించి, అక్టోబర్ 18న విడుదల చేయనున్న ఈ చిత్రంలో పవన్‌కళ్యాణ్ అభిమానులు ఆశించే అన్ని అంశాలు వుండే డిఫరెంట్ యాక్షన్ చిత్రం ఇదని ఆయన వివరించారు. నిర్మాత డి.వి.వి.దానయ్య మాట్లాడుతూ- ఇది ఓ సెనే్సషనల్ చిత్రం అవుతుందని, పూరీ, పవన్‌కళ్యాణ్ కలయికలో ప్రతిష్టాత్మకంగా నిర్మాణమవుతుందని, ఈ చిత్రాన్ని అక్టోబర్ 18న విడుదల చేయడానికి సన్నాహాలు చేస్తున్నామని తెలిపారు. ఈ కార్యక్రమంలో అల్లు అర్జున్, బి.వి.ఎస్.ఎన్.ప్రసాద్, బండ్ల గణేష్‌బాబు, జెమినీ కిరణ్ తదితరులు పాల్గొన్నారు. ప్రకాష్‌రాజ్, బ్రహ్మానందం, అలీ, ఎమ్మెస్ నారాయణ, కోట శ్రీనివాసరావు, తనికెళ్ల భరణి తదితరులు నటిస్తున్న ఈ చిత్రానికి కెమెరా: శ్యాం కె.నాయుడు, ఎడిటింగ్: ఎస్.ఆర్.శేఖర్, నిర్మాత: డి.వి.వి.దానయ్య, కథ, మాటలు, స్క్రీన్‌ప్లే, దర్శకత్వం: పూరీ జగన్నాథ్.
